Soċjetà Mużikali Peace Naxxar

Illum, l-Erbgħa tat-Tniebri, il-lokalità tan-Naxxar se tilqa’ attività speċjali li tħejji lill-komunità għall-ġranet solenni tal-Ġimgħa l-Kbira. Il-𝑩𝒂𝒏𝒅𝒂 𝑷𝒆𝒂𝒄𝒆 se ttella’ Kunċert Ġenerali ta’ Marċi Funebri, b’repertorju magħżul apposta għal dan iż-żmien, li joffri mument ta’ riflessjoni u serenità. Dan il-kunċert mhux biss huwa parti mill-preparamenti għall-purċissjoni tal-Ġimgħa l-Kbira, iżda wkoll opportunità sabiħa biex il-pubbliku japprezza l-wirt mużikali u kulturali tagħna f’atmosfera unika u spiritwali.

Nhar Ġimgħa l-Kbira 3 ta' April, ġurnata memorabbli fil-kalendarju mużikali tas-Soċjetà, il-Banda Peace, bħalma tagħmel kull sena, se tagħti s-sehem tagħha fil-purċissjoni b’daqq ta’ marċi funebri mill-isbaħ, fosthom marċi funebri ġodda, uniċi u esklussivi, quddiem il-vara l-kbira. Il-banda tibda ddoqq mill-pjazza għal ħabta tas-6:15pm.

Nhar il-Ħadd 5 ta’ April, il-Banda Peace, bi pjaċir u unur kbir bħalma tagħmel kull sena, se takkumpanja l-istatwa artistika ta’ Kristu Rxoxt fit-toroq tan-Naxxar. Matul il-purċissjoni, il-banda se tesegwixxi għadd ta’ marċi brijużi, klassiċi kif ukoll valzi, li jżidu mal-atmosfera ferriħija ta’ din il-festa. Il-purċissjoni tibda fl-10:00am bil-ħruġ tal-istatwa tal-Irxoxt, bis-sehem tal-banda.

The Grand Easter Lunch se ssir il-Ħadd, 5 ta’ April 2026, fis-1:00pm, fis-Sala Marija Bambina, Palazzo Vittoria, Naxxar. Dawk interessati jattendu jistgħu jagħmlu l-booking tagħhom minn OTTO Clubhouse, permezz ta’ Messenger, billi jċemplu fuq 79266106 jew billi jikkuntattjaw lil wieħed mill-membri tal-Kumitat.

Il-Għaqda tan-Nar Marija Bambina Naxxar (A.D. 2012) tħabbar li se tkun qed tipparteċipa fil-kompetizzjoni tal-Malta International Fireworks Festival, fil-kategorija tan-nar tal-art mekkanizzat għall-edizzjoni tal-2026. L-għaqda tawgura kull suċċess lill-pirotekniċi tagħha, li se jkunu qed jirrappreżentaw lin-Naxxar f’dan l-avveniment prestiġjuż. L-attività se ssir nhar is-Sibt, 18 ta’ April 2026, fi Pjazza San Publiju (fuq il-Fosos), il-Floriana.